Нийслэлийн Засаг дарга С.Батболд Улаанбаатарт эзэмшлийн газаргүй

Нийслэлийн Засаг дарга С.Батболд өнгөрсөн долоо хоногт "Хот ба сэтгүүлч" чөлөөт ярилцлага хийж, Улаанбаатар хотод хэрэгжүүлж буй болон хийхээр төлөвлөсөн ажлаа танилцуулав.

Уулзалтаар газрын асуудал яригдах үед "Би хотын дарга болсноос хойш шинээр нэг ч аж ахуйн нэгжид газар олгоогүй. Улаанбаатар хот цэцэрлэг, сургууль, томоохон стадион барих газаргүй болсон. Шүүхийн маргаан нь шийдэгдсэн зарим нэг газрын асуудлыг шийдэж байна.

Улаанбаатар хотын үе үеийн дарга нар газрын асуудлаар маш их хэл аманд өртөж байсныг нь өнөөг хүртэл улс төрд явсны хувьд гадарлах болсон учир энэ асуудалд анхнаасаа болгоомжтой хандсан. Миний хувьд Улаанбаатар хотод эзэмшлийн газаргүй. Би 0.05 га газраа хөдөөнөөс өмчилж авсан" гэв.